مناظرات مع المسلم المصري - (1)

** هذة المناظرات هدفها فقط هو إظهار زيف وكذب ما يدعيه البعض عن العقيدة المسيحية وتوضيح الحقائق من خلال الحوار والنقاش .. ولكل شخص في النهاية الحكم بما يراه!
.
مسلم مصري يقول:
.

انا طول عمرى بتكلم بطريقة موضوعية ومتحضرة.

شهادتك مجروحة يا صديقي المسلم المصري ..
وهو إحنا اصلا نعرفك يا بني علشان كنا نشوفك إذا كنت انت بتتكلم بطريقة موضوعية او غير موضوعية ..؟! وبعدين مش انت اللي تحكم علي نفسك وتقول إنك بتتكلم بطريقة متحضرة أو غير متحضرة إنما الناس هي اللي ليها الحق تحكم في كدة !

حضراتكوا اللى بتخلونى اتكلم بالطريقة دى.

وهو علشان حضراتنا .. سيادتك بقي تتنازل عن الموضوعية اللي بتتغني وتتكلم بها طوال عمرك (كما تقول) وتنزل بالمستوي دا في الكلام اللي مفهوش ريحة الموضوعية والإحترام ..؟! طيب يا سيدي .. حضراتنا وحشين ومش بنتكلم بنفس الموضوعية بتاعت سيادك, خليك أنت بقي أحسن مننا في الكلام .. وخلّي عندك مبدأ في الحياة .. وإذا كنت انت إنسان موضوعي طوال حياتك كما تدعيّ, إزاي بقي تنازلت عن هذة الموضوعية فجاءة كدة ..؟! للأسف .. واضح إنك معندكش مبدأ ماشي عليه في حياتك .. بس مجرد كلام في كلام ...

وبعدين عمرك ماوجهتى نصايحك دى لخادم المسيح على لغته العنصرية أو الاخ المسيحى المجهول ولا حضرتك شايفة انهم بيتكلوا بطريقة موضوعية ومتحضرة !!

مين قال كدة يا صاحبي ..؟ الأخت ماريكا - وقبل ما سيادتك ترد عليها - وجهت لي كلام ونصحتني فيه بأن أكون أكثر موضوعية ومنساش إن المدونة دي (تقصد مدونة حسن الهلالي) مدونة علمانية ومش دينية. ودا كان نص كلامها:

Servant of Christ,
Try to be more objective and
remember that this is a secular blog
not a religious one

وأنا بشكرها علي كل حال وبقولها فعلا عندك حقا .. أنا علماني ومؤمن بالعلمانية .. لكن مش معني إني علماني إني أكون ملحد بالأديان .. العلمانية اللي مؤمن بيها هي فصل الدين عن الدولة وليست فصل الإنسان عن ربنا! إذن يا صديقي المسلم المصري إتهامك لماريكا مش صحيح وواضح إنك إنسان متسرع في إطلاق الأحكام وإنك حتي مش بتقرأ التعليقات قبل ما تتكلم .. !

بما انك مش بتقبلى ان حد يسخر او يشتم رمز دينى من رموز ديانتك يبقى مفروض مش تقبلى ده على الغير ايضا ! لكن للاسف كلكم بيجمعكم شىء واحد كره لكل ماهو اسلامى !

.
وهل أنت بقي اللي بتحب كل ما هو مسيحي .. ؟! طيب إحنا كمسيحيين ربنا أوصانا بالتسامح والغفران ومحبة كل الناس بما فيهم اللي بيسبونا ويلعنونا مثل بعض ما يقوم به المشايخ الأفاضل في خطب يوم الجمعة من دعاء علي النصاري واليهود! .. حضرتك بقي إتعلمت إيه من ربنا في الإسلام .. ؟! هل إتعلمت التسامح "عين بعين وسن بسن" .. ؟! ولا إتعلمت الغفران "ومن إعتدي عليكم فإعتدوا عليه بمثل ما إعتدي عليكم" ..؟! ومن الاّخر كدة, إحنا كمسيحيين مش هنقبل او نعترف بأي كتاب أو رسالة غير اللي جاء بها ربنا يسوع المسيح .. لكن في نفس الوقت دا مش هيمنع حبنا وإحترامنا للمسلمين كاشخاص وأصدقاء لنا في المجتمع وكإخوة لنا في الإنسانية.

عموما .. حضرتك سالتينى اسئلة وانا قبل ما اجاوب عليها هاسالك الاول : هاتيلى اسم شيخ واحد من اللى ذكر اسمهم او اللى بيطلعوا فى الفضائيات يوميا حث على قتل المسيحييين مره واحده ؟ انا عايز اسم واحد فقط من الشيوخ المعروفين وحث المسلمين على قتل المسيحين ومستنى اجابتك؟ مش عارف حضرتك بتجيبى معلوماتك منين؟ عموما انا مستنى اجابتك؟

أنا ممكن أجاوبك علي السؤال دا .. عايز اسم شيخ واحد ..؟! طيب إيه رأيك يا حبيبي في الدكتور محمد عمارة اللي أصدر كتاب من كام سنة فاتت بيكفّر فيه المسيحيين وبيستحل دماءهم وأموالهم ... ؟!! ومحمد عمارة مش مجرد شيخ وبس .. لا, دا راجل دكتور وعلاّمة ومن علماء الدين في الأزهر! تحب أجيبلك اسامي تانية ولا كفاية كدة عليك ..؟

ثانيا: بالنسبة لموضوع التكفير طبيعى جدا انى كافر بالمسيحية وحضرتك كافرة بالاسلام. ده شىء طبيعى لكن ده مايديش الحق اننا نقتل المسيحيين وانما العيش جنبا الى جنب فى امان واحنا مأمورين بكده والكلام مش كلام خطب ده دين. اقرأى الحديث: عَنْ النَّبِيِّ ‏صَلَّى اللَّهُ عَلَيْهِ وَسَلَّمَ ‏‏قَالَ ‏: ‏مَنْ قَتَلَ نَفْسًا مُعَاهَدًا لَمْ يَرِحْ رَائِحَةَ الْجَنَّةِ وَإِنَّ رِيحَهَا لَيُوجَدُ مِنْ مَسِيرَةِ أَرْبَعِينَ عَامًا. وحضرتك النفس المعاهدة يعنى بينا وبينكم عهد على العيش بأمان جنبا الى جنب فى وطن واحد.

طيب إيه رايك يا صديقي المسلم المصري فيما تقوله سورة التوبة - الاّية 29 :- قوله تعالي : قاتلوا الذين لا يؤمنون بالله ولا باليوم الآخر ولا يحرمون ما حرم الله ورسوله ولا يدينون دين الحق (الإسلام) من الذين أوتوا الكتاب (اليهود والنصاري) حتى يعطوا الجزية عن يد وهم صاغرون ..؟! مش دا برضه يعتبر أمر بمباشر بقتال المسيحيين واليهود حتي يدفعوا الجزية وهم أذلاء .. ؟! مستني الإجابة ! وبالنسبة للحديث اللي حضرتك بستشهد به فهو حديث يطبق فقط علي أهل الكتاب من النصاري واليهود الذين رضخوا لدفع الجزية للمسلمين .. يعني المسيحي واليهودي اللي بيدفع الجزية في الحالة دي بس قتله حرام .. لكن في حالة رفضه او عجزه عن دفع الجزية .. فيكون مصيره هو إما إعتناق الإسلام إما أن تؤخذ رأسه بحد السيف !! وإرجع لتاريخ الفتوحات الإسلامية وإقرأ كتب التاريخ بنفسك علشان لو مش مصدق!

ثالثا : حضرتك عايزة اسماء ..؟ طيب واللى زكريا بطرس بيعمله يوميا من سخرية من رسولنا وسب وشتايم لكل ماهو اسلامى ده تسمية ايه !!!

القمص زكريا بطرس لم يسب أو يشتم أحد .. لكنه بكل بساطة بيعرض تساؤلات عن الإسلام .. وأظن اّن الأوان إن المسلمين يبدأوا يفهموا الإسلام ويسألوا ويناقشوا فيه بحرية تامة .. ! كفاية بقي الغيبوبة اللي عايشين فيها من 14 قرن !! أبونا زكريا عنده إستعداد للنقاش والرد علي مشايخ الإسلام .. لكن حد من هؤلاء المشايخ رد علي حاجة غير إنهم بس بيهددوه بالقتل ..؟!

واللى بيحصل فى الكنايس .. ؟ مين حضرتك اللى عمل المسرحية المسيئة للاسلام ورسولنا صلى الله عليه وسلم مسرحية كنت اعمى والان ابصر .. واتسببت فى احداث اسكندرية .. ؟

طالما المسرحية دي لم تحض علي الكراهية او تشجع علي العنف والقتال ضد غير المسيحيين, إذن فهي حق من حقوق أبناء الكنيسة .. حقهم أن يكون لهم الحرية في التعبير باللي شايفينه مناسب! ولا إنت هتصادر حريتهم وهتفرض رقابة علي عقولهم .. ؟!

ومين اللى اعتكف فى الدير لما وفاء قسطنطين اسلمت ويقال انها اتقتلت؛ لكن النكرة محمد حجازى يطلع فى كل وسائل الاعلام عادى جدا ...فين حرية العقيدة دلوقتى !

طيب .. هات دليل واحد إنها إتقتلت في الدير زي ما بتقول .. ولا هو كلام وبس .. ؟! وهي لو إتقتلت فعلا, تفتكر الأمن والبوليس والنيابة هتسكت علي الموضوع دا بكل بساطة .. ؟! ما هو للاسف .. انت بتقول كلام من غير متفكر فيه .. مجرد بس بغبغان كل وظيفتك ترديد أقاويل الزغلول النجار وغيرهم من شيوخك الأفاضل ! والبابا شنودة إعتكف في الدير .. طيب وانت مالك يا حبيبي؟! البابا شنودة راهب وطبيعي إنه يعتكف في الدير ولا انت هتتدخل في حياته كمان ..؟!